მე არ ვარ ბოზი ანუ მითი ბოზობის შესახებ

შთაგონებული მანქის პოსტით

მე შეგხვედრივარ თბილისის ქუჩებში, თვალში საცემი წითელი პომადით, დეკოლტით, მოკლე კაბითა თუ დახეული ჯინსებით, მუდამ მოღიმარი. შენ არასდროს გიფიქრია ჩემზე მსგავსი რამ, რომ მე ვარ ბოზი.

შენ ტაქსის მძღოლი ხარ, რომლის მანქანით გვიან ღამით მიწევს მგზავრობა. შეიძლება თვალი გამოგეპაროს მოკლე კაბისკენ, სარკიდან თვალიერება დამიწყო და რამე თემაზე მოისურვო ჩემთან საუბრის წამოწყება, მაგრამ თავში აზრადაც არ მოგივა, რომ მე ვარ ბოზი.

შენ შუახნის მამაკაცი ხარ, რომელიც შუაღამით ქუჩაში გადააწყდება უგონოდ მთვრალ ბიჭებს და მათ შორის ერთადერთ გოგოს, რომელსაც მიყუდებული აქვს ლუდის ბოთლი და მშვენიერ ხასიათზეა. შენ გაიქნევ თავს, და მხოლოდ იმას იფიქრებ “ეს დალევა რას უშვრება ხალხს”, მაგრამ აზრადაც არ მოგივა, რომ მე ვარ ბოზი.

შენ დედაჩემი ხარ, არ მოგწონს არც ჩემი სტრინგი და არც პირსინგი, მაგრამ სულ რომ შიშველმა გავიარო, არასდროს, არასდროს იფიქრებ, რომ მე ბოზი ვარ.

ჩემი უბნელი ნიკა ხარ. მხოლოდ საღამოს მხედავ, სახლიდან გაჩერებისკენ მიმავალს და გვიან ღამით გაჩერებიდან სახლში მომავალს. ეს უცნაურად გეჩვენება, მაგრამ ამის გამო არასდროს გიფიქრია, რომ მე ვარ ბოზი.

შენ შუახანს გადაცილებული ქალბატონი ხარ, ძალიან ხშირად მხვდები და მაყოლებ მზერას, ხედავ რომ ვეზასავები ჩემს შეყვარებულს თითქმის ყველგან სადაც მომინდება, უსმენ ჩვენს ბილწ ხუმრობებსა თუ ერთმანეთისადმი უწმაწურ მიმართვებს, უყურებ როგორ ვუჯდებით მონაცვლეობით ერთმანეთს კალთაში თუკი ავტობუსში ადგილი არ არის, როგორ ვიცინით მთელ ხმაზე. შენ ფიქრობ “როგორ გაირყვნა ახალგაზრდობადა” და რომ “გოგოს არ შეეფერება ასეთი საქციელი”, გულის სიღრმეში კი გშურს, რომ საკუთარი გრძნობების ასე გულწრფელად გამოხატვა არ შეგიძლია ან ვერ შეძელი თავის დროზე, მაგრამ აზრად არ მოგივა თავში, რომ მე ვარ ბოზი.

შენ ხარ ჩემი ოპონენტი ბექა კამათში და იცი, რომ მე ვამტკიცებ, რომ თუკი კაცს შეუძლია ერთი ქალის გარდა ჰქონდეს სასიყვარულო ურთიერთობა სხვებთან, ქალსაც შეუძლია არ შემოიფარგლოს მარტო ერთ მამაკაცთან ურთიერთობით და ამის გამო ის არ უნდა იყოს გასაკიცხი. ჩემი ასეთი შეხედულების გამო, შენ სულაც არ ფიქრობ, რომ მე ბოზი ვარ.

შენ წაგიკითხავს ამ ბლოგზე პოსტი გენდერული თანასწორობის შესახებ, იცი, რომ არ მიმაჩნია, რომ ქალი ქმრის მორჩილი უნდა იყოს და ამის გამო სულაც არ მოგდის თავში აზრად, რომ მე ვარ ბოზი.

მოკლედ, მიუხედავად ყველაფრისა, ყველამ კარგად იცით, რომ მე არ ვარ ბოზი და საერთოდ “ბოზად” შეფასების “კრიტერიუმი” სულ სხვაა.