ზღაპრები ალტერნატიული დასასრულით

“ცხორობდნენ ისინი დიდხანს და ბედნიერად” – ზღაპართა უმრავლესობა ამ წინადადებით სრულდება ხოლმე. მაგრამ რა მოხდება თუ “ჰეფი ენდის” ნაცვლად ზღაპარს რეალური, ცხოვრებისეული დასასრული ექნება? როგორ იცვლება ზღაპრის გმირთა ცხოვრება “ჰეფი ენდის” შემდეგ? რა იქნება, თუ მათი ცხოვრება სულაც არ გაგრძელდება ისე, როგორც ზღაპარშია მოთხრობილი? ფოტოგრაფი დინა გოლდსტეინი შეეცადა პასუხი გაეცა ამ კითხვისთვის და შემოგვთავაზა ფოტო-პროექტი, სადაც დისნეის პრინცესები რეალური ცხოვრებისეული პრობლემების წინაშე დგანან. “პატარაობისას ჩემი ქალიშვილი ძალიან გატაცებული იყო დისნეის პრინცესებით. ამავე პერიოდში დედაჩემს მკერდის კიბოს დიაგნოზი დაუსვეს. დავფიქრდი: რა მოხდება თუკი პრინცესებსაც მოუწევთ კიბოსთან, ფინანსურ პრობლემებთან ან სხვა ცხოვრებისეულ სირთულეებთან გამკლავება?”- ყვება დინა. ასე გაჩნდა პროექტის ‘Fallen Princesses'(“დაცემული პრინცესები) იდეა.

ფიფქია: ჩემი ფავორიტი ფოტო ამ პროექტიდან. ძალიან ნაცნობი სიტუაციაა, ბევრის სასიყვარულო ამბავი საოცნებო ზღაპარივით იწყება, დაქორწინების შემდეგ კი ყველაფერი იცვლება: თეთრ რაშზე ამხედრებული პრინცი გაზულუქებულ ქმრად იქცევა, რომელსაც ტრადიციულად ტელევიზორის ყურება და ბრძანებების გაცემა უყვარს, ცოლი კი შინამოსამსახურის და ბავშვების მომვლელის ფუქნციას ასრულებს. 

რაპუნცელი: პრინცესას კიბოს დიაგნოზს დაუსვამენ და ის თავის მშვენებას – თმას კარგავს 

ბელი: პრინცესა არაა უკვდავი, ამიტომ ასაკში შესვლისას მასაც მოუხდება ნაოჭებთან ბრძოლა სილამაზის შესანარჩუნებლად. ამის მისაღწევად პრინცესა პლასტიკურ ქირურგიასაც მიმართავს.

ჟასმინი: არაბული სამყაროს არასტაბილურ გარემოს თუ გავითვალისწინებთ, სულ არ იქნება უჩვეულო, ჟასმინს ხელში იარაღის დაჭერა და ქვეყნისთვის ბრძოლა მოუწიოს, ისევე როგორც ამ რეგიონში მცხოვრებ ბევრ ქალს.

წითელქუდა: ერთ დღეს ის დედის გამომცხვარ ღვეზელს McDonald’s-ის პროდუქტს არჩევს, შედეგად კი წონაში მოიმატებს

არიელი: მას, მხოლოდ იმიტომ რომ ქალთევზაა, აკვარიუმში მოათავსებენ და ყოველდღიურად ათასობით ადამიანის ცხნობისმოყვარე მზერის ატანა მოუწევს.

პოკაჰონტასი: საყვარელი მამაკაცის ლოდინის გამო გოგონა დეპრესიაში ჩავარდება. ის სახლში ჩაიკეტება და მისი ერთადერთი საზრუნავი შინაური ცხოველები იქნებიან.

მძინარე მზეთუნახავი: მისი ძილი ძალიან დიდ ხანს გასტანს, პრინცს ამასობაში ჭაღარაც გაუჩნდება და მოხუცთა სახლშიც მოხვდება, მაგრამ სიყვარულის გამოღვიძების იმედს მაინც არ დაკარგავს.

პრინცესა ბარდის მარცვალზე: დღეს პრინცესა ხარ და სასახლეში ცხოვრობ, ხვალ კი შესაძლოა რადიკალურად შემოტრიალდეს ყველაფერი. ასე დაკარგავს პრინცესა ტიტულს და ნაგავსაყრელზე აღმოჩნდება.

კონკია: ყოფითი პრობლემებისაგან გასაქცევად ის სპირტიან სასმელებს მიეძალება და ალკოჰოლიკი გახდება

ფოტოები შეგიძლიათ ნახოთ აქ.

ცხოველთა საერთაშორისო დღე თბილისში

ოთხ ოქტომბერს ცხოველთა საერთაშორისო დღე ცხოველთა დამცველებმა თბილისში საპტოტესტო აქციით აღნიშნეს. აქციის მთავარი მოთხოვნა იყო იმ პირების პასუხისგებაში მიცემა, რომლებიც სასტიკად ეპყრობიან ცხოველებს. გასულ წლებში ასი ათასამდე უპატრონო ძაღლი სასტიკი მეთოდებითაა მოკლული. თბილისის მერიამ მაწანწალა ძაღლების პოპულაციის მართვისა და შემცირების პრობლემის მოგვარება შპს “დებიუტს” გადააბარა. “დებიუტმა” კი ეს პრობლემა ძაღლების დახოცვით გადაჭრა. თანაც მას ამისთვის სამ მილიონამდე ლარი ერგო ბიუჯეტიდან. არსებობს ამის დამადასტურებელი კადრებიც, რომლებიც გადაცემაში “გრიფის გარეშე” გაშუქდა (36-ე წუთიდან).

თუმცა, დღემდე ამ ფაქტთან დაკავშირებით, სამწუხაროდ, არავინ დასჯილა. სისხლის სამართლის 259-ე მუხლის თანახმად  ცხოველისადმი სასტიკი მოპყრობა, რამაც მისი დაღუპვა ან დასახიჩრება გამოიწვია, აგრეთვე ცხოველის წვალება, ისჯება ჯარიმით ან გამასწორებელი სამუშაოთი ვადით ერთ წლამდე. ხოლო ქმედების განმეორების შემთხვევაში – თავისუფლების აღკვეთით ვადით ორ წლამდე. ცხოველთა დამცველმა ორგანიზაციებმა მიმართეს პოლიციას გამოეძიათ ზემოაღნიშნული ფაქტები და დაესაჯათ ცხოველთა მკვლელები, რომლებიც ნათლად ჩანან გადაცემის კადრებში. პასუხად კი ეს წერილი მიიღეს:

აი ასე, მოკლედ და მარტივად: მასალები არ შეიცავს სისხლის სამართლის კანონით გათვალისწინებულ დანაშაულის ნიშნებს და გამოძიების დაწყების საფუძველი არ არსებობსო.

ცხოველებისთვის მაშებით ხერხემლის გადატეხისთვის, ნახევრად ცოცხალი ძაღლების ორმოებში ჩაყრისა და შემდეგ მათზე მჟავის გადასხმისთვის ადამიანებს მილიონებს უხდიან, პოლიცია კი ამაში დანაშაულის ნიშნებს ვერ ხედავს. ესაა ჩვენი სამწუხარო რეალობა. როგორც კი ცხოველთა დაცვაზე მიდგება საუბარი, მაშინვე გამოხტებიან ჭკუის მსწავლებლები: ცხოველებზე ზრუნვას სჯობს გაჭირვებულებს დაეხმაროთო. ჩვენი საზოგადოებისთვის ეს პრობლემა მეასეხარისხოვანია, მაგრამ საბედნიეროდ არსებობენ ადამიანები, ვისაც ეს თემა ადარდებს და არ იშურებს ძალებს ცხოველთა დასაცავად.

აქციის საპატიო მონაწილე