რა ხდებოდა Gem fest 2016-ზე

ცოტა დიდი დრო კი გავიდა Gem fest-ის დასრულებიდან, მაგრამ ჩემი შთაბეჭდილებების შესახებ აუცილებლად უნდა დავწერო, განსაკუთრებით იმ უარყოფითი მხარეების შესახებ, რაც ფესტივალს ჰქონდა. თანაც მომავალ წელს ერთთვიანი ფესტივალი იგეგმება და იმედია ორგანიზატორები წლევანდელ მინუსებს გაითვალისწინებენ და გამოასწორებენ.

ანაკლიაში ჩასვლისთანავე პირველ ამოცანად დავისახეთ ბილეთების გადაცვლა “მულტიპასებზე”, რომელთა გარეშე ვერ მოვხვდებოდით ფესტივალის ტერიტორიაზე. მიუხედავად იმისა, რომ ანაკლია ერთი პატარა სოფელია, გადასაცვლელი პუნქტის მოძებნა არც ისე ადვილი აღმოჩნდა. ადგილობრივები აზრზე არ იყვნენ სად შეიძლებოდა ბილეთის ყიდვა/გადაცვლა. ერთმა საერთოდ სხვა მიმართულებით გაგვიშვა. საბოლოოდ ბევრი ფერადი ადამიანი სადაც დავინახეთ, იქ მივედით. ღამენათევები და ნამგზავრები, თაკარა მზის ქვეშ დაახლოებით ერთი საათი ვიდექით რიგში.

https://www.instagram.com/p/BI6_VNGjv3L/?taken-by=i_am_dreamar

Tbilisi Open Air 2015 – დღე პირველი

Tbilisi Open Air 2015-ის პირველმა დღემ ჩაიარა. პირველი დღის შთაბეჭდილებები ასეთია:

მიუხედავად იმისა, რომ თბილისის ზღვის ახალ ქალაქში წასვლამდე თვალი გადავავლე ფესტივალზე მყოფთა კომენტარებს, რომ ფესტივალის ტერიტორიაზე ციოდა და რამე თბილი ტანსაცმლის წამოღება აჯობებდა, ასეთ სიცივეს მაინც არ ველოდი. სიცივე რა – საშინელი ქარი ქროდა: თმები გამეწეწა, თვალები ქვიშით ამომევსო. ეტყობა ქარს ხელი შეუწყო ადგილმაც – გარშემო ერთი-ორი ხე თუ იდგა, ერთი სიტყვით უდაბნო იყო. ადგილს, ამინდსა და ქარს ბევრი უარყოფითი გამოხმაურება მოყვა.

პირველ დღეს ნამდვილად ეტყობოდა არაორგანიზებულობა. რიგები ბილეთების სალაროსთან, რიგები შესასვლელში, რიგები ფესტივალიდან გასვლისას, რიგები ნებისმიერ ბართან, რიგები საპირფარეშოებთან. ზოგიერთს biletebi.ge-ს შემთხვევა მოაგონა ამ ამბავმა. თუმცა, 90-იანების რიგებგამოვლილ ადამიანს მსგავსი რამ ნაკლებად თუ შემაშფოთებს. 15 წთ რიგში დგომა არაა პრობლემა, თუ ხალხი რიგს დაიცავს და არ დაგეჯაჯგურება, გვერდიდან არ შემოძვრება – ხალხის უკულტურობას კი ნამდვილად ვერ დავაბრალებთ ორგანიზატორებს. ერთი საპირფარეშოსთან რიგია ცოტა შემაწუხებელი – აქ ვერ გაძლებ დიდხანს ^^ არაორგანიზებულობა გამოიხატებოდა შემდეგში – შთაბეჭდილება შემექმნა, რომ სალაროებში სრულიად დაბნეული ადამიანები ისხდნენ, რომლებსაც არავითარი კოორდინაცია არ ქონდათ ერთმანეთთან – საშვის ასაღებად რიგში დიდი ხნის დგომის შემდეგ პირველი სალაროს გამყიდველმა მეორესთან გაგვიშვა, მეორემ – მესამესთან, მესამემ – “მე საერთოდ აზრზე არ ვარ სად ხდება გაცემაო”. ასე გავიდა, თითქმის ერთი საათი. მოკლედ, კარგი იქნებოდა სტაფი უკეთ დაეტრენინგებინათ მსგავს გაუგებრობას რომ არ ქონოდა ადგილი.

სასმელზე ითქვა ასევე ბევრი ცუდი – ლუდი იყო თბილიო. ძალიან ნაცნობი თემაა – თითქმის არცერთ ფესტივალს არ ჩაუვლია მის გარეშე. პრეტენზიები ასეთ შემთხვევაში, ალბათ, პირველ რიგში, გამყიდველ კომპანიებთან/ადამიანებთან უნდა გვქონდეს. თუმცა, სავარაუდოდ, ამის დარეგულირება შეიძლებოდა გამყიდველთათვის სასმლის მაცივარში შენახვის მთავარ პირობად წაყენებით. მე ლუდი არ დამილევია, დავლიე ადუღებული კოკა-კოლა, მაგრამ იმ მომენტში ჩემთვის მნიშვნელობა არ ქონდა სასმლის ტემპერატურას – ძალიან მწყუროდა.

მუსიკოსებს რაც შეეხება, 3 ივლისის მთავარი გამომსვლელი იყო ზემფირა, ლაინაფი კი ასე გამოიყურებოდა:

✔ Main Stage:
16:30 – 17:00 Mellow
17:05 – 17:35 Ducktape
17:45 – 18:30 сухие
18:45 – 19:40 Tiger Lillies
19:50 – 21:20 Aquarium
21:50 – 23:10 Zemfira

✔ Golden Stage/Night:
23:10 – 00:00 The Forest
00:00 – 02:00 Kollektiv Turmstrasse
02:00 – 04:00 Stephan Bodzin
04:00 – 05:20 Newa
05:20 – 06:30 The Forest
6:30 – Greenbeam & Leon

ყველაზე მეტად მაინტერესებდა გერმანელი მუსიკოსებისგან შემდგარი დუეტი Kollektiv Turmstrasse. საბოლოოდ მათ შორიდან მოსმენას დავჯერდი. ზემფირას წლების წინ ვუსმენდი – ალბათ, მაშინ უფრო მეტად გამიხარდებოდა და ბევრად მეტ ემოიციას მოიტანდა მის ლაივზე დასწრება. თუმცა, უნდა ითქვას, რომ უკრაინის დროშის მოფრიალე ზემფირამ ნამდვილად კარგი პერფორმანსი მოაწყო სცენაზე.

მთავარი კი წინ არის!

დაუჯერებელი ამბავი – თბილისში Placebo ჩამოდის

გუშინ მთელი საქართველო ზეიმობდა გაიგო რა Open Air-ის ლაინაფის შესახებ. Placebo, Archive, Kill it Kid, Kollektiv Turmstrasse, Zemfira, Beth Hart და სხვები 3-7 ივლისს თბილისს ეწვევიან. ფესტივალში მონაწილეობას ქართველი მუსიკოსებიც მიიღებენ: Lady Heroine, The Georgians, Salio, MAMM, The Jetbird, Sophie Villy, Scratch The Floor, არა, Erekle Deisadze & Vinda Folio, The Black Marrows, The Mins … სულ 60-მდე შემსრულებელი 5 დღის განმავლობაში გაგვაბედნიერებს საკუთარი მუსიკით. ფესტივალი ღია ცის ქვეშ, თბილისის ზღვის ახალი ქალაქის მიმდებარე ტერიტორიაზე გაიმართება.

ლაინაფის ჰელაინერების ვინაობა რამდენიმე კვირით ადრე გავიგე, თუმცა, იმდენად დაუჯერებელი იყო ჩემთვის, მორიგი ჭორი მეგონა. გუშინ, ფესტივალის ორგანიზატორის, AlterVision Group-ის  მიერ ლაინაფის ოფიციალურად გამოცხადების შემდეგ ბოლო მოეღო  ეჭვებს. ეს დღეებია სრულიად აჟიტირებული დავდივარ ^_^

Placebo-ს განცხადება მათ ოფიციალურ facebook გვერდზე

გუშინდელ “ზარზეიმთან” ერთად სოც. ქსელებში კრიტიკული კომენტარებიც დაიწერა მცირე რაოდენობით. აბიტურიენტი მოსწავლეები, რომელთაც ფესტივალს ეროვნული გამოცდების პერიოდი ემთხვევათ, ფესტივალის თარიღს აპროტესტებდნენ. ასევე, როგორც ყოველთვის, საუბარი იყო ბილეთის სიძვირეზე. თუმცა, 5 დღიანი აბონიმენტისთვის 110 ლარი, 60-მდე შემსრულებლითა და ასეთი მაგარი ჰედლაინერებით, ნამდვილად არაა ძვირი!

6 წელი გავიდა პირველი Tbilisi Open Air-დან. დღესაც კარგად მახსოვს მაშინდელი შთაბეჭდილებები. პირველივე დღიდან ვგულშემატკივრობ ამ ფესტივალს და ყოველ ოფენეარს ვესწრები. ჩემი იმედები გამართლდა: ფესტივალი ტრადიციად იქცა და ბევრი კარგი მუსიკოსის მოსმენის საშუალება მოგვცა.

შეგიძლიათ იხილოთ წინა ოფენეარების მიმოხილვები:

Tbilisi Open Air 2013

Tbilisi Open Air 2012

Tbilisi Open Air 2011

Tbilisi Open Air 2009

პ.ს. რა მოითმენს 4 ივლისამდე!!!

Tbilisi Winter Set

14 თებერვალს, მთაწმინდაზე, კლუბი UNDERWHEEL  ელექტრონული მუსიკის ფესტივალს – Winter Set-ს მასპინძლობდა. ადრეც დავწერე, ძალიან კარგი ტრადიცია დამკვიდრდა  Batumi Summer Set-ის ორგანიზატორების მიერ: ეს ფესტივალი სეზონური გახდა – ასე, რომ წელიწადში ოთხჯერ ელექტრონული მუსიკისა და ცეკვის მოყვარულებს აქვთ საშუალება მოუსმინონ როგორც უცხოელ, წარმატებულ დიჯეებს, ასევე ქართველ მუსიკოსებს.

ამჯერად საქართველოს ლონდონელი DJ Max Cooper ეწვია. მსმენელების წინაშე ასევე წარდგნენ Vincent, The Forest და Stimmhalt. შთაბეჭდილებები შემდეგია: მომეჩვენა, რომ ის მუსიკა, რასაც უკრავდნენ, ცოტა არ იყოს, ერთფეროვანი იყო. მოკლედ, მუხტი დამაკლდა, შესაძლოა, დაღლილობის ბრალიც იყო. 🙂 კლუბს რაც შეეხება: არაერთხელ აღმინიშნავს, რომ მსგავსი ივენთებისთვის UNDERWHEEL შესაფერისი ადგილია. მცირე მინუსები: საპირფარეშოსთან ისევ უზარმაზარი რიგი იყო და გარდერობში ადგილები აღარ იყო დარჩენილი. საბედნიეროდ, ადრე მოვედი და მოვასწარი ჩანთის დადება, წინააღმდეგ შემთხვევაში ძალიან არაკომფორტულად ვიგრძნობდი თავს პალტოთი და ჩანთით ხელში რომ მეცეკვა.

სამუშაო დღის მერე რაც ენერგია მქონდა შემორჩენილი, სულ ცეკვაში დავხარჯე ^^ დილის ხუთ საათამდე მედგრად გავუძელი “დენსფლორის გამოცდას” და სახლში დაღლილ-დაქანცული, სიგარეტის კვამლით გაჟღენთილი დავბრუნდი.

გაკვეთილი: კლუბში საცეკვაოდ თუ მიდიხარ, თან ცოტა დაღლილი ხარ, არასდროს დალიო ლუდი. უფრო მოგთენთავს და ძილს მოგგვრის. ამიტომ, ჯობია სხვა სასმელზე შეაჩერო არჩევანი :დ

მოკლედ, ახლა უკვე Spring Set-ს ველოდები ^^

ფესტივალის ძველი მიმოხილვები:

Tbilisi Fall Set

Batumi Summer Set 

Faithless თბილისში

Faithless თბილისში

გადადებული Batumi Summer Set -ის ბოლო დღე გუშინ გაიმართა. როგორც იქნა, ქართველმა მსენელმა Faithless იხილა სცენაზე. მოკლედ მიმოვიხილავ რა მომეწონა ამ ღონისძიებაში და რა არა:

ადგილმდებარეობა: ლისის ტბის მიმდებარე ტერიტორია, ყოფილი ქარხანის შენობა – მასშტაბური მუსიკალური ივენთებისთვის ერთ-ერთი ყველაზე შესაფერისი ადგილი. ძალიან დადებითად იმოქმდება განწყობაზე.

ვიზუალური ეფექტები და გაფორმება: უმაგრესი. ფესტივალის ერთ-ერთი ყველაზე კარგი მხარე.

კონკურსები, პატარა აქციები: როგორც ფესტივალის წინა დღეებში, ბოლო დღესაც სხვადასხვა გათამაშებაში მონაწილეობით პრიზები მოვიგე. მსგავსი აქციების გამართვა ნებისმიერ ივენთზე არის ძალიან კარგი და კრეატიული იდეა 🙂

მუხტი: დადებითი. ხალხს ეტყობოდა რომ მუსიკის მოსასმენად, საცეკვაოდ, გასართობად და უბრალოდ განტვირვისთვის იყო მოსული. არ მეგონა ასეთი ხალხმრავალი თუ იქნებოდა ფესტივალის ბოლო დღე. Faithless-ის გამოსვლისას სცენის წინ იმდენმა ადამიანმა მოიყარა თავი, რომ სუნთქვა ჭირდა. ამ მუსიკალური პროექტის პერფორმანსმა კიდევ უფრო გააღვივა არსებული დადებითი მუხტი, რის გამოც დიდი ემოციები და აპლოდისმენტები დაიმსახურა.

მუსიკა და შემსრულებლები: მართალია კონცერტზე, პირველ რიგში, Faithless-ის გამო ვიყავი მისული, მაგრამ ფესტივალის სხვა მონაწილეებიც კარგები იყვნენ. ამ დღის ლაინ აფი ასეთი იყო:

20:00 Vako. T
22:00Vako key
23:30 Mao and The Mins
00:20 Gio Shengelia and Sikha
01:20 Faithless Live PA and DJ Set
03:20 Vincent and Lasha

ტრანსპორტი: მეტრო დელისიდან ღონისძიების გამართვის ადგილამდე  საღამოს ცხრიდან დილის ხუთამდე გადიოდნენ სპეციალური ავტობუსები. ორგანიზატორების მხრიდან მსგავს საკითხზე ზრუნვა მხოლოდ პოზიტიურად უნდა შეფასდეს.

და ბოლოს, რაც ნაკლებად მომეწონა იყო “ზვუკი”. ზოგიერთ მომენტში ბასები ძალიან ხმამაღლა ისმოდა, ვოკალის ხმა კი საერთოდ იკარებოდა.

საბოლოო ჯამში კარგი მუსიკალური ღონისძიება იყო 🙂

Batumi Summer Set 2013

22 და 23 აგვისტოს ბათუმში ელექტრონული მუსიკის ფესტივალი “ბათუმი სამერ სეტი” გაიმართა. მართალია ფესტივალი სამდღიანი უნდა ყოფილიყო, მაგრამ ორ დღეშიც საკმაოდ ბევრი დადებითი შთაბეჭდილება მივიღე.

პირველ დღეს ყველაზე მეტი ოვაცია წილად ხვდა Laid Back-ს – დანიურ ელექტრონულ დუეტს, რომელიც 1979 წლიდან არსებობს. სიმართლე გითხრათ, მათი ორადორი სიმღერა ვიცი: “Sunshine Reggae” და “Happy Dreamer”. ამ დუეტის დიდი თაყვანისმცემელი არ ვარ, ამიტომ შორიდან ვადევნებდი მათ გამოსვლას თვალს. უფრო სწორად ყურს ვუგდებდი, რადგან სცენიდან იმდენად შორს ვიყავი ამ დროს, რომ ვერც დავინახავდი.  ჩემი ფავორიტი ამ დღის ლაინ აფ-ში იყო ბრიტანელი დიჯეი  Synkro.

მეორე დღეს იმდენი ნაცნობი ვნახე, სულ აქეთ-იქით მიწევდა სიარული, ამიტომ თავიდან ბოლომდე ვერცერთ გამომსვლელს ვერ მოვუსმინე, გარდა Sleep Party People-სა: ყველაზე განსხვავებული ბენდი იყო ამ ფესტივალის ლაინ აფში. კურდღლისნიღბიანმა ბიჭებმა დანიიდან ნამდვილი ფურორი მოახდინეს სცენაზე. 

ამ დღის გამომსვლელებიდან კიდევ გამოვარჩევდი Giraffage-ს: 23 წლის კალიფორნიელ დიჯეის.

ფოტოს პირველწყარო

ყველაზე მეტად Batumi Summer Set-ზე Faithless-ს (უფრო სწორედ პროექტს, სადაც მონაწილეობენ ამ ჯგუფის მთავარი წევრები Maxi Jazz და Sister Bliss) ველოდებოდი, რომელიც ბოლო, მესამე დღეს უნდა გამოსულიყო. ჩემი წარდგენა არ ჭირდება ამ ბრიტანულ ელექტრონულ ბენდს. “Insomnia”, “God Is a DJ”, “We Come 1” – აქედან ერთი ტრეკი მაინც გექნებათ მოსმენილი. ყველაზე საშინელი ფესტივალის ბოლო დღე გამოდგა: სამწუხაროდ, კონცერტი წვიმის გამო ჩაიშალა. Faithless-ის ნახვა არ მეღირსა. ბევრმა ცუდ ორგანიზებას დააბრალა კონცერტის ჩაშლა, იმ მიზეზით, რომ ორგანიზატორებს ამინდის პოგნოზი უნდა გაეთვალისწინებინათ. სანამ ჩაშლის დეტალებზე გადავალ, ორიოდე სიტყვით ორგანიზებაზე ვიტყვი:

ძალიან კარგად იყო მოწყობილი ფესტივალის ადგილი: გადახურული იყო საკმაოდ დიდი ტერიტორია (სამი დიდი ბარი, სცენის მიმდებარე ტერიტორია). მეორე დღეს ბევრმა წვიმას სწორედ ამ გადახურულ ადგილებს შეაფარა თავი. ასევე მომეწონა ვიზუალური გაფორმება. გარდა მუსიკის მოსმენისა შეგეძლო უამრავ საინტერესო გათამაშებაში მიგეღო მონაწილეობა და მოგეგო სხვადასხვა პრიზი. პირადად მე და ჩემმა მეგობრებმა თითქმის ყველგან მოვსინჯეთ ძალები და ფესტივალიდან საჩუქრებით დატვირთულები წამოვედით. მგონი პირველად მოხდა ისე, რომ ასეთი მასშტაბის ფესტივალზე არავის უჩხუბია, მიუხედავად იმისა, რომ გარშემო უამრავი ალკოჰოლმიღებული ყმაწვილი დაიარებოდა.

რაც შეეხება კონცერტის მესამე დღეს: ამოვარდა ძლიერი ქარი და წვიმა, ფესტივალის ტერიტორია დაიტბორა ბათუმის “საოცრებათა პარკის” სანიაღვრე სისტემის გაუმართაობის გამო, მოხდა მოკლე ჩართვა და დაიწვა აპარატურა. გარდა ამისა, მსგავსი სიმძლავრის შტორმი კიდევ იყო მოსალოდნელი რამდენიმე საათში, სწორედ ამიტომ ორგანიზატორებმა ფესტივალის გადადების გადაწყვეტილება მიიღეს. ალბათ, მომავალში საფესტივალო ადგილის შერჩევისას უფრო მეტი ყურადღება მიექცევა სანიაღვრე სისტემის გამართულობას. მაგრამ ისევე როგორც შეუძლებელია გათვალო სად, როდის და როგორი სიმძლავრის მიწისძვრა მოხდება, ასევე შეუძლებელია გამოიცნო  ამინდის ზუსტი პროგნოზი.

როგორც Batumi Summer Set-ის ფეისბუქ გვერდზე წერია ბილეთების დაბრუნების ყველა მსურველს თანხას უკან მისცემენ. სანამ ბილეთებს დააბრუნებდეთ, ერთ კარგ ამბავს გეტყვით:

20 სექტემბერს, ამჯერად თბილისში, ფესტივალის ბოლო დღე გაიმართება იმავე პროგრამით, რომელიც თავიდან იყო გაცხადებული:

20:00 Vako Key and Vako T.
22;00 Mao and The Mins
23:00 Gio Shengelia and Sikha
00:45 Rone Live
01:45 Faithless Live PA and DJ Set
03:30 Vincent and Lasha

შეინახეთ ძველი ბილეთები, გამოგადგებათ 🙂

Oasis ფესტივალის მიმოხილვა

ორი დღის განმავლობაში მცხეთაში თეატრონის მიმდებარე ტერიტორია მუსიკალური ფესტივალის ქალაქად იქცა. ადამიანები  აღმოჩდნენ ჩვეულისგან განსხვავებულ გარემოში, სადაც შეგეძლო დაგესვენა, გართობოდი, შეგეძინა ახალი მეგობრები, დამტკბარიყავი მუსიკით, გეცეკვა, დაგელია, გეთამაშა ორდროშობანა თუ ხელბურთი, გარუჯულიყავი კიდეც, ერთი სიტყვით საინტერესოდ გაგეტარებინა დრო.

არცერთ ქართულ მუსიკალურ ღონისძიებას არ მოყოლია ამდენი პოზიტიური გამოხმაურება, რაც ოაზის ფესტივალს მოყვა. ის ადამიანებიც კი, რომლებიც საკმაოდ სკეპტიკურად იყვნენ განწყობილნი ფესტივალის მიმართ, საკუთარ აღფრთოვანებას ვერ მალავდნენ. ფესტივალამდე იყო ბევრი კითხვა, რომლებსაც ორგანიზატორებმა დროულად ან საერთოდ ვერ გასცეს პასუხი. ამან ბევრი გააღიზიანა. მაგრამ საბოლოო ჯამში ყველაფერმა კარგად ჩაიარა. ეს არ იყო მარტო კარგი მუსიკისა და “ზვუკის” დამსახურება. ფესტივალისთვის შესაფერისი ადგილი, კარვების ქალაქი, სხვადასხვა სპორტული და გასართობი ღონისძიება, ერთი სიტყვით, გარემო იყო ძალიან კარგი. შეკრებილი ადამიანებიც იყვნენ პოზიტიურად განწყობილნი. ბევრმა აღნიშნა, რომ განსხვავებით სხვა კონცერტებისგან, სადაც უხვად დაიარებიან იქ სრულიად შემთხვევით აღმოჩენილი ტიპები, რომლებიც ხან “როკერი” გოგოების გასაცნობად მოდიან და ხან უმიზეზო ჩხუბის ასატეხად, მცხეთაში ნაკლებად იყვნენ.

Salio

The Balloon Shooters

LOUDspeakers

ოაზის ფესტივალი ქართულმა ჯგუფმა The Jetbird გახსნა. ძალიან ვისიამოვნე ქართული ბენდებით. ძალიან კარგები იყვნენ და არ ჩამოუვარდებოდნენ უცხოურ ჯგუფებს Loudspeakers, Salio, The Balloon Shooters.

უცხოური ბენდებიდან ძალიან მომეწონა დანიური ინდიროკ, დენს-პანკ ბენდი Whomadewho. მსმენელებისგან ბევრი ტაში და ოვაცია დაიმსახურეს. ერთადერთი ჯგუფი იყო ფესტივალზე, ვინც ბისზე ისევ გამოვიდა.

Whomadewho

Whomadewho

Mumiy Trol-მა ბავშვობა გამახსენა, ოდესღაც მიყვარდა ეს ჯგუფი, განსაკუთრებით მისი ვოკალისტი, მუდამ მოღიმარი ილია ლაგუტენკო. :დ

ილია ლაგუტენკო

5’nizza–ს ყოფილი ვოკალისტის ანდრეი ზაპოროჟეცის (სანის) ბენდმა “SunSay” ასევე დიდი ოვაციები დაიმსახურა, განსაკუთრებით ყველასთვის ნაცნობი სიმღერის “Солдат”-ის შესრულებისას.

SunSay

ხალხი ააცეკვა და სცენაზე “ცეცხლი დაანთო” გერმანულმა ელექტრონულმა ბენდმა სექსუალური “ფრონტვუმენით” Jahcoozi.

Jachoozi

მიუხედავად იმისა, რომ ოაზის ფესტივალი იყო კარგი და ყველა აღფრთოვანებული დარჩა მისით, არ შემიძლია არ დავწერო იმ მინუსებზე, რაც მას ახლდა:

1. დაგვიანება: ორივე დღეს კონცერტი დაახლოებით ერთი საათის დაგვიანებით დაიწყო. საქართველოში იმდენად მიჩვეულები ვართ დაგვიანებას, რომ ამას ნაკლად არ მივიჩნევთ.

2. ფესტივალზე არ გამოსულა ლაინაფში მითითებული ბენდი Juveniles. ამას მაშინ მივხვდი, როცა სცენაზე მათ ნაცვლად სხვა ბენდი გამოვიდა: ZIG ZAG & CO პროექტი ქართველი ბასისტითა და დრამერით, ასევე ფრანგი პიანისტით სახელად ზიგი. კარგად მახსოვს რა ცუდი გამოხმაურება მოყვა როცა ოფენეარზე მსმენელმა Modesselektor ვერ იხილა.

3. არც მე და არც ჩემს მეგობრებს დაცვასთან ან პოლიციასთან არ შეგვქმნია პრობლემა. მაგრამ როგორც შემდეგ გავიგე, მარიხუანის მოწევის გამო რამდენიმე ადამიანი საკმაოდ უხეში ფორმით დააკავეს (ზოგი ამბობს 60-მდე, შსს კი მხოლოდ ორი ადამიანის დაკავებასა და დაჯარიმებას ადასტურებს). ეს იგივეა ალკოჰოლის დალევის გამო დაეჯარიმებინათ ვინმე იმ მიზეზით, რომ საზოგადოებრივ ადგილებში დალევა არ შეიძლება. ასევე ძალიან სამწუხაროა, რომ პოლიცია და დაცვა (ყველა არა, რა თქმა უნდა) ხშირ შემთხვევაში არ იქცევა ზრდილობიანად და თავაზიანად. ამ მხრივ ბევრი სამუშაოა.

პ.ს ძალიან მიხარია, რომ საქართველოში უფრო და უფრო მეტი მუსიკალური ღონისძიება ტარდება და ვიღაც ღვთისნიერი ადამიანები ჩვენს გართობასა და დროის საინტერესოდ გატარებაზე ზრუნავენ.

ფესტივალის ფოტოები შეგიძლიათ იხილოთ აქ.

ფესტივალი Oasis-ი

ამ ფესტივალზე მითქმა-მოთქმა დიდი ხნის წინ დაიწყო. სახელწოდების გამო ბევრს ეგონა, რომ ბრიტანული როკ-ბენდი, აწ უკვე დაშლილი Oasis ჩამოდიოდა საქართველოში. სინამდვილეში Oasis Festival-ს საერთო არაფერი აქვს ძმებ გალაჰერების ჯგუფთან. ფესტივალი 22-23 ივნისს გაიმართება მცხეთაში, თეატრონის პარკში. დაუკრავენ როგორც ქართული, ასევე ევროპული ბენდები (Mumiy Troll,  Jahcoozi, Loudspeakers, Motorama, Whomadewho, The Jetbird, Sunsay, Juveniles…)

გარდა მუსიკოსების გამოსვლისა შეგეძლებათ დაესწროთ სხვადასხვა სპორტულ ღონისძიებას, ვორკშოპებს. ფესტივალის ტერიტორიაზე გათვალისწინებულია ადგილი კემპინგისა და პარკინგისთვის. ასევე იქნება ბევრი კვებითი ობიექტი.

ფესტივალის ადგილმდებარეობის რუკა

ბილეთებს რაც შეეხება: თავდაპირველად 19 ლარად იყიდებოდა ბილეთი ორივე დღისთვის, ამჟამად 28 ლარიანი ბილეთებია დარჩენილი. აქ შეგიძლიათ გაეცნოთ მათი შეძენის წესებს. როგორც ვიცი, ბილეთები ადგილზე უფრო ძვირად გაიყიდება, ამიტომ აჯობებს წინასწარ იყიდოთ.

ფესტივალის ადგილზე მოსახვედრად იქნება სპეციალური ტრანსპორტი, რომელიც გავა სპორტის სასახლიდან და ეღირება 2 ლარი. გარდა ამისა დიდუბედან მცხეთის მიმართულებით ყოველ 15 წუთში გადის სამარშრუტო ტაქსები. დაწვრილებითი ინფოსთვის ნახეთ ეს ლინკი.

ბევრი კითხვა გააჩინა ფესტივალზე დაწესებულმა წესებმა:

ყველაზე დიდი გაოცება ჩემში კონფეტის შეტანის აკრძალვამ გამოიწვია. როგორც აღმოჩნდა, კონფეტში “კანფეტი” არ იგულისხმება, ესაა ფერად-ფერადი ქაღალდის პაწაწა მრგვალი ნაჭრები, რომელთაც გასართობად თავზე აყრიან ერთმანეთს ბალებსა და მასკარადებზე. ( წყარო http://www.nplg.gov.ge)

უკმაყოფილება გამოიწვია ჩანთის დადგენილმა ზომებმაც: ძნელი წარმოსადგენია ასეთ ჩანთაში კარავი ჩაგეტიოს, თუმცა, როგორც განმარტეს, კარავის მქონეთათვის გამოყოფილი იქნება სხვა შესავლელი. ზომის გამო კარვის შეტანისას პრობლემა არ შეგექმნებათ. ჩანთის ზომების მითითება იმისთვის გახდა საჭირო, რომ ტერიტორიაზე არ მოხდეს აკრძალული ნივთების და სასმლის შემოტანა.

მოწევას რაც შეეხება: აკრძალულია მხოლოდ ბავშვებისთვის განკუთვნილ ზონაში.

პროფესიონალური ფოტო-ვიდეო აპარატებით გადაღების აკრძალვა ჩვეულებრივი მოვლენაა ნებისმიერ ფესტივალზე. მათ, ვისაც სურს პროფესიონალური კამერის შემოტანა, უნდა გაიაროს აკრედიტაცია. მობლურით და არაპროფესიონალური კამერით გადაღება ნებადართულია.

ერთი სიტყვით, წესების პირველი წაკითხვისას გაჩენილ კითხვებს ჩემთვის პასუხი გაეცა.

მონაწილეების სრულ სიას შეგიძლიათ გადახედოთ აქ:

საინტერესო შაბათ-კვირა გველოდება წინ 🙂

Tbilisi Open Air 2013

ვაგრძელებ ტრადიციას და გთავაზობთ Tbilisi Open Air 2013-ის მიმოხილვას. ამ ფესტივალს პირველი ოფენეარის დღიდან ვადევნებ თვალს და ვაშუქებ.

პირველი გამომსვლელი, რომელსაც მოვუსმინე, იყო The Subways (სამწუხაროდ, ვერც Kid Jesus-ს და ვერც Black Strobe-ს ვერ მივუსწარი). The Subways – ეს იყო ცეცხლი, ცხრა ბალიანი მიწისძვრა, ცუნამი სცენაზე!!! მუსიკოსების შესრულების ხარისხი, მოძრაობები, დაკვრის მანერა – ყველაფერი გადმოსცემდა უდიდეს მუხტსა და ენერგიას. ძალიან კარგი იყო ეს სამეული!

მსმენელთა უმეტესობა Deep Purple-ის გამო იყო მოსული, მე კი ყველაზე ნაკლებად მაინტერესებდა მათი მოსმენა. ჯგუფის წევრთა ასაკი საერთოდ არ ასახულა შესრულების ხარისხზე. არ დაიჯეროთ თუ ვინმე გეტვყით, დაბერდნენო. მიუხედავად ამისა, ძალიან მომბეზრდა გიტარის გაუთავებელი სოლოები და ერთი სული მქონდა როდის ავიდოდა სცენაზე შემდეგი გამომსვლელი.

Infected Mushroom-ზე ძალიან მოვილხინე. კარგი იქნებოდა აუდიტორიისთვის უფრო ნაცნობი სიმღერები შეესრულებინათ, მაგრამ რაც იყო, ძალიან კარგი იყო.

“ფარფლების” გამოსვლის შემდეგ დინამო არენის დაცარიელება დაიწყო. წინა ოფენ ეარი გამახსენდა: უმეტესობა რომ მარტო DDT-ს მოსასმენად იყო მოსული და ზოგ-ზოგიერთები Dub Fx-ის სცენიდან “ჩამოძევებას” მოითხოვდნენ. ბევრმა თქვა, ჯობდა Deep Purple სულ ბოლოს ჩაესვათ line-up-ში დარბაზის დაცარიელებისგან თავის დაზღვევის მიზნით, მაგრამ მსგავს შემთხვევაში არაა გამორიცხული ბოთლების სროლა დაეწყოთ სცენაზე მდგომი მუსიკოსებისთვის ფარფლების მოთხოვნით

თრიქი ხალხს სცენაზე ასვლისკენ მოუწოდებს

თრიქის გამოსვლა რამდენიმე ასეულ ადამიანთან მოუწია. მარტო წინა რიგში იდგა ხალხი. უკანა რიგები კი სულ ცარიელი იყო. წარმოგიდგენიათ: დიდი სივრცე, შენ გარდა კაციშვილი რომ არაა, შენ პირდაპირ კი Tricky უკრავს და რასაც გინდა იმას აკეთებ. კარგი შეგრძნება იყო.

ასე გამოიყურებოდა დინამო არენა თრიქის გამოსვლისას

ფესტივალის ყველაზე დიდი ფეილი მისი დაბოლოება იყო: ხალხი Modeselektor-ს ელოდა. თრიქის გამოსვლის შემდეგ კი უცებ შუქი ჩაქრა და სცენაზე აპარატურის ალაგება დაიწყეს. ვიღაცებმა თქვეს, ბოლო გამომსვლელი აღარ იქნება, წავიდნენ რადგან თვითმფრინავის რეისზე აგვიადნებოდათო (კონცერტი ორი საათით გვიან დაიწყო). თუმცა, ორგანიზატორებიდან არავინ გამოსულა და აუხსნია მიზეზი, რატომ მოხდა ასე. წარმოიდგინეთ, რა ცუდ დღეში ჩავარდებოდნენ Modeselektor-ის მოსასმენად მოსული ადამიანები. დღის 5-დან ღამის ოთხამდე რომ ელოდები ბენდს და უცებ, არა რამდენიმე საათით ადრე, არამედ წესით და რიგით ამ ბენდის გამოსვლის დროს იგებ, რომ აღარ გამოვა

ყველა ივენთის ერთი დიდი პრობლემაა დაცვის წარმომადგენლები ვერც ოფენეარი იყო გამონაკლისი. ზოგიერთ დასაჯდომ ადგილზე მყოფ ადამიანს ფეხზე დადგომას უკრძალავდნენ თურმე, ზოგს გასვლისას და მერე ისევ შემოსვლისას შეექმნა პრობლემა (არადა ბილეთები ნაყიდი ჰქონდათ). დაცვის წევრებმა არ იციან ვის როგორ უნდა მოექცნენ, ზოგჯერ ზედმეტად უხეშები და უზრდელები არიან. რა თქმა უნდა, ყველას არ ეხება. მაკავშირებს რა არცთუ სასიამოვნო მოგონებები დაცვასთან, ერთი ადვილად განსახორციელებელი იდეა მომივიდა თავში: ტრენინგები ჩაუტარონ, აუხსნან ზუსტად რა ევალებათ, შეიმუშავონ  მათთვის განკუთვნილი “ქცევის კოდექსი”. ტრენერის როლში მეც გამოვდგები 😀

კარგი იქნებოდა დარბაზში დადგმულ ეკრანებზე ეჩვენებინათ რა ხდებოდა სცენაზე. ზოგიერთი მუსიკოსის გამოსვლა ვერ მოხვდა ეკრანზე. არადა უკანა რიგებში საერთოდ ვერ ხედავდნენ შემსრულებლებს.

ორიოდე სიტყვა მინდა ვთქვა პრე-ფართიზე: ფესტივალამდე რამდენიმე დღით ადრე მთაწმინდის პარკში, ბორბლის ქვეშ გაიმართა ოფენეარის პრე–ფართი. ამ ღონისძიებაში მონაწილეობა მიიღეს: Catch The Clouds, SALIO, Gio Shengelia & Sikha, Green Room… არ შემიძლია არ აღვნიშნო, რომ ძალიან კარგი ივენთი იყო სწორად შერჩეული ადგილითა და დამსწრე საზოგადოებით.

ერთ-ერთი ყველაზე მნიშვნელოვანი ფესტივალი ქართულ მუსიკალურ სივრცეში დასრულდა. ველოდები Tbilisi Open Air 2014-ს! 🙂

პ.ს. წინა ოფენეარების მიმოხილვები:

Tbilisi Open Air 2012

Tbilisi Open Air 2011

Tbilisi Open Air 2009

DDT vs Dub FX/Tbilisi Open Air 2012

Tbilisi Open Air 2012-იც დასრულდა. 2009 და 2011 წლების ოფენეარებთან შედარებით წლევანდელი ფესტივალი ბევრად მასშტაბური იყო. წელს გაცილებით მეტი ხალხი მოვიდა კონცერტზე და მედიის მხრიდანაც ყურადღება უფრო დიდი იყო. ეს, პირველ რიგში, ალბათ, ფესტივალის ჰედლაინერმა ბენდმა  – DDT-მ გამოიწვია. DDT-ს, ჯერ კიდევ 1980 წელს, საბჭოთა რუსეთში დაარსებული ჯგუფის, ლაინაფში გამოჩენამ ბევრის გული გაახარა და ფესტივალზე მისვლა გადააწყვეტინა. პირადად მე ფესტივალზე ნაკლებად მაინტერესებდა მამაჩემის თაობის საყვარელი ჯგუფის ხილვა, რომელსაც, ცოტა არ იყოს, ნაფტალინის სუნი ასდის. (მე მაპატიეთ დდტ-ს ფანებო :)) თუმცა, უნდა ითქვას, რომ მართლაც ძალიან კარგად დაუკრეს კონცერტზე და თითქმის არავინ დაუტოვებიათ გულგრილი თავისი შესრულებით.