Posts Tagged the Georgians

დაუჯერებელი ამბავი – თბილისში Placebo ჩამოდის

Tbilisi Open Aor 2015

გუშინ მთელი საქართველო ზეიმობდა გაიგო რა Open Air-ის ლაინაფის შესახებ. Placebo, Archive, Kill it Kid, Kollektiv Turmstrasse, Zemfira, Beth Hart და სხვები 3-7 ივლისს თბილისს ეწვევიან. ფესტივალში მონაწილეობას ქართველი მუსიკოსებიც მიიღებენ: Lady Heroine, The Georgians, Salio, MAMM, The Jetbird, Sophie Villy, Scratch The Floor, არა, Erekle Deisadze & Vinda Folio, The Black Marrows, The Mins … სულ 60-მდე შემსრულებელი 5 დღის განმავლობაში გაგვაბედნიერებს საკუთარი მუსიკით. ფესტივალი ღია ცის ქვეშ, თბილისის ზღვის ახალი ქალაქის მიმდებარე ტერიტორიაზე გაიმართება.

ლაინაფის ჰელაინერების ვინაობა რამდენიმე კვირით ადრე გავიგე, თუმცა, იმდენად დაუჯერებელი იყო ჩემთვის, მორიგი ჭორი მეგონა. გუშინ, ფესტივალის ორგანიზატორის, AlterVision Group-ის  მიერ ლაინაფის ოფიციალურად გამოცხადების შემდეგ ბოლო მოეღო  ეჭვებს. ეს დღეებია სრულიად აჟიტირებული დავდივარ ^_^

Placebo-ს განცხადება მათ ოფიციალურ facebook გვერდზე

Placebo-ს განცხადება მათ ოფიციალურ facebook გვერდზე

გუშინდელ “ზარზეიმთან” ერთად სოც. ქსელებში კრიტიკული კომენტარებიც დაიწერა მცირე რაოდენობით. აბიტურიენტი მოსწავლეები, რომელთაც ფესტივალს ეროვნული გამოცდების პერიოდი ემთხვევათ, ფესტივალის თარიღს აპროტესტებდნენ. ასევე, როგორც ყოველთვის, საუბარი იყო ბილეთის სიძვირეზე. თუმცა, 5 დღიანი აბონიმენტისთვის 110 ლარი, 60-მდე შემსრულებლითა და ასეთი მაგარი ჰედლაინერებით, ნამდვილად არაა ძვირი!

6 წელი გავიდა პირველი Tbilisi Open Air-დან. დღესაც კარგად მახსოვს მაშინდელი შთაბეჭდილებები. პირველივე დღიდან ვგულშემატკივრობ ამ ფესტივალს და ყოველ ოფენეარს ვესწრები. ჩემი იმედები გამართლდა: ფესტივალი ტრადიციად იქცა და ბევრი კარგი მუსიკოსის მოსმენის საშუალება მოგვცა.

შეგიძლიათ იხილოთ წინა ოფენეარების მიმოხილვები:

Tbilisi Open Air 2013

Tbilisi Open Air 2012

Tbilisi Open Air 2011

Tbilisi Open Air 2009

პ.ს. რა მოითმენს 4 ივლისამდე!!!

placebo

Advertisements

, , , , , , , , , , , , , , , , , , , , , , , , , ,

2 Comments

Altervision newcomers 2011

შეიძლება ამ პოსტის დაწერა დამაგვიანდა, მაგრამ არ შემიძლია ერთი პოსტი არ მივუძღვნა ალტერვიჟენის ფესტივალის თემას. მითუმეტეს რომ ადრეც აქტიურად ვაშუქებდი.

მაშინ როცა თბილისისა და საქართველოს ერთი ნაწილი სარკოზობის ბრწყინვალე დღესასწაულს აღნიშნავდა, ან ცოტა უფრო გვიან, თბილისის მოქალაქეებს საშუალება ჰქონდათ თბილისობის დღესასწაული ალტერნატიულად აღენიშნათ, მწვადებისა და ტრადიციული სუფრული სიმღერების გარეშე.

Altervision Newcomers 2011 სპორტის სასახლესთან, ღია ცის ქვეშ გაიმართა. სარკოზის რა ვუთხარი, რაღა მაინცდამაინც ამ დღეს მოუნდა ჩამოსვლა :/ ზუსტად მაგის გამო მხოლოდ ბოლო ორ გამომსვლელს მივუსწარი. არადა ძალიან დიდი სურვილი მქონდა ფესტივალში მონაწილე შემსრულებლების მოსმენისა.

Altervision Newcomers – ის Line Up:

– Landmark
– Radioactive
– The Mins
– SvanSikh
– The Georgians
– Countryman
– Rema
– Plus Master
– Global House Project

Plus Master

პირველ რიგში მინდა ვთქვა, რომ მან, ვინც იმის გამო არ წამოვიდა კონცერტზე, რომ უფასო იყო, ჩემი აზრით, ძალიან ბევრიც დაკარგა. კარგი იქნებოდა, რომ ბილეთებით ყოფილიყო ფესტივალზე დასწრება: როგორც არაერთმა აღნიშნა, ასეთ შემთხვევაში, ის ხალხიც აღარ მოვიდოდა აქ, ვისაც არაფერი ესაქმებოდა. მაგრამ მე პუბლიკას დიდად არ შევუწუხებივარ, არც “გარჩევების” მომსწრე ვყოფილვარ და არც “ამას მუსიკა როგორ უნდა ერქვას” მსგავსი ფრაზები მომისმენია. შეიძლება იმიტომ, რომ სცენასთან ვიდექი და ჩემ უკან რა ხდებოდა, ნაკლებად ვადევდენბდი თვალს.
ცოტა შემაცბუნა სცენის შორიახლოს გაშლილმა მაგიდებმა, მწვადის სუნმა და იქ მოქეიფე ხალხმა. ნამდვილად აჯობებდა მსგავსი სანახაობა სცენასთან არ ყოფილიყო.

რაც შეეხება “ზვუკს”, ნორმალური იყო. სპორტის სასახლეში გამართულ წინა ალტერვიჟენზე ბევრად კარგი მომეჩვენა. ყველაზე ყველაზე მთავარი: ძალიან მომეწონა ჯგუფების შესრულება! ყოჩაღ მუსიკოსებს! თითქმის ყველამ აღნიშნა ეს.

Global House Project

ერთი დასკვნა, რაც გამოვიტანე ისაა, რომ სავსებით შესაძლებელია მცირე ფინანსებით კარგი, ნორმალური კონცერტის გამართვა: მთავარი არც შოუა, არც მუსიკოსთა ტანსაცმელი და მაკიაჟი, მთავარია შესრულება და ხმის ჟღერადობა!

ერთი რამ, რაც ასევე ძალიან “ტეხს” არის ის, რომ გამომსვლელ ბენდებს ჰონორარი არ გადაუხადეს :/

, , , , , , , , , ,

5 Comments

AlterVision Newcomers-ის შოუქეისზე გასული ბენდების სია

AlterVision Newcomers-ის კონცერტი უკვე ტრადიციად იქცა. ყოველი წლის შემოდგომას ახალბედა ჯგუფებს ეძლევათ შანსი წარდგნენ დიდი აუდიტორიის წინაშე და მონაწილეობა მიიღონ ერთ-ერთ ყველაზე ნორმალურად ორგანიზებულ კონცერტში. ჯერ კიდევ ერთი წლის წინანდელ პოსტში ვწერდი “მიუხედავად უამრავი კრიტიკისა და მოწინააღმდეგისა, Tbilisi Altervision Newcomers–ს მნიშვნელოვანი მოვლენაა მუსიკალურ სამყაროში. სერიოზული მზადება, სასცენო კოსტუმებისა და მაკიაჟის შერჩევა, მაღალი ხარისხის live–ჩანაწერი, უზარმაზარი რეკლამა და პიარი _ ეს ყველაფერი ძალიან დიდი სტიმულია ახალბედა შემსრულებლებისთვის. როკ–კლუბსა თუ ხორავას თეატრში გამართულ უღიმღამო კონცერტებთან შედარებით ალტერვიჟენი ნათელი წერტილია.”

შარშან ამ კონცერტში მონაწილეობის მსურველთა რიცხვი 114 ბენდმა გამოთქვა. წელს მათი რიცხვი, თუ არ ვცდები, 40-მდე იყო. (შეგასხენებთ, რომ იმ ბენდებს/მუსიკოსებს ვისაც უნდოდა Newcomers AlterVision-ში მონაწილეობა, 5 სექტემბრიდან 15 სექტემბრის ჩათვლით “ალტერვიჟენ გრუფის” ოფისში უნდა გამოეგზავნათ შემდეგი საბუთები 1)3 აუდიო ჩანაწერი (MP3 ფორმატში), 2)ჯგუფის ბიოგრაფია, 3)ჯგუფის ფოტოსურათი, 4)ვიდეო, 5)შევსებული სარეგისტრაციო ფორმა).

წელს მზადება ალტრვიჟენისთვის შარშანდელთან შედარებით უფრო ადრე დაიწყო 😛
უკვე ცნობილია იმ ბენდების სია, ვინც შოუ-ქეისზე მიიღებს მონაწილეობას (ამის შემდეგ გაირკვევა, ვინ გამოვა AlterVision Newcomers-ის კონცერტზე). ეს ბენდებია:
The Georgians
Radioactive
The Pulse
Shota Adamashvili “Country Man”
Rema
The Animals from Mars
Svansikh
Landmark
Side Effect
Global House Project
Fuck’n’Roll
November
Burn
Fly
Plus Master
Eleqtromouse
Dress Code
The Mins

ამ სიაში გამიხარდა The Georgians, Radioactive, Landmark და შოთა ადამაშვილის ხილვა. Radioactive-ს სულ ცოტა ხნის წინ გავეცანი და მომეწონა. თქვენ თავად შეაფასეთ ამ სიმღერით:

Landmark-ს რაც შეეხება, დიდი ხანია მომწონს მათი შემოქმედება და შექმნის დღიდან ვადევნებ ამ ბენდს თვალს. ძალიან კარგი მოგონებები მაკავშირებს ამ ჯგუფთან :პ ესეც ჩემი ერთ-ერთი უსაყვარლესი სიმღერა:

The Georgians-ს ერთხელ უკვე აქვს მონაწილეობა მიღებული AlterVision Newcomers-ში. ამ კონცერტების შესახებ შეგიძლიათ შემდეგ პოსტებს გაეცნოთ.

შოთა ადამაშვილი, იგივე ქანთრიმენი, შეიძლება პროექტ”ნიჭიერიდან” გახსოვდეთ ან სადმე მიწისქვეშა გადასასვლელში შეხვედრიხართ. ძალიან კარგი და ნიჭიერი ადამიანია : )

არ შემიძლია Svansikh-ზე არ ვთქვა ორიოდე სიტყვა: არც ისე დიდი ხანია რაც მისი ახალი ტრეკი მოვისმინე და მაშინვე მოვიხიბლე:

უფრო დაწვრილებით ინფორმაციას და ცნობებს სხვა ჯგუფების შესახებ შემდეგ პოსტებში გაგაცნობთ. 🙂
მანამდე კი შეგიძლიათ წაიკითხოთ ჩემი პოსტი შარშანდელ AlterVision Newcomers-ზე.

, , , , , , , , , , , , , ,

3 Comments

The Georgians 5 წლისაა!

23 მარტი. გეუბნებათ რამეს ეს თარიღი? თუ არა, მაშინ გეტყვით, რომ ზუსტად ხუთი წლის წინ ამ რიცხვში შეიქმნა ჯგუფი The Georgians: ოთხმა ქართველმა ბიჭმა სცადა ისეთი არაქართული მუსიკის დაკვრა, როგორიცაა ბრიტპოპი და ინდი. ჯგუფის წევრების განცხადებით, ყველაზე მეტად მათზე გავლენა იქონია ბენდებმა Oasis, Doves,Muse.

ყველაფერი ასე იწყებოდა:

ამ 5 წლის განმავლობაში The Georgians-მა მოასწრო 115 კონცერტის გამართვა, მათ შორის მიიღო მონაწილეობა Alter Vision/Newcomers, Tbilisi Alter\Vision\stars for newcomers, Nights Of Arles in Tbilisi, ევროვიზიის შესარჩევ ტურში. გახდა პროექტ “აივნის” პირველი სეზონის გამარჯვებული. 5 წლის განმავლობაში 5-ჯერ გამოიცვალა დრამერი. The Georgians-ის წევრები შეგხვდებიან სხვა ჯგუფებშიც: დრამერის გარდა ყველა წევრი უკრავს მინიმუმ ორ ბენდში.

დაბადების დღესთან დაკავშირებით 23 მარტს კლუბ “პარაშუტში” გაიმართა კონცერტი. The Georgians-ს დაბადების დღე კონცერტზე გამოსვლით მიულოცეს ჯგუფებმა:Mutual Friends, The Smile, ShuSha, Lady Heroine, Zurgi, The Sticklers, Pink Pantera, Junk Yard, Loudspeakers. განსაკუთრებული სტუმრის სტატუსით იმყოფებოდა თბილისის ოპერის სოლისტი ირინა თაბორიძე. “პარაშუტში” ხალხის ტევა არ იყო. კონცერტი დასრულდა დიჯეების Thoma-ს, Amo-სა და Papuka-ს სეტებით. სულ რამდენიმე საათში დახეულჯინსიანი და კეტებიანი აუდიტორია შეცვალეს მაღალ ქუსლებზე შემდგარმა ქლაბერებმა.


Loudspeakers-ის ვოკალისტი string-ის გიტარისტთან


შუშა


Mutual Friends და ქარჩხა


Zurgi გიორგი მარის გარეშე The Smile-ს ბიჭებთან :დ


The Smile


Pink Pantera


Junk Yard


Lady Heroine


The sticklers


The Georgians & ირინა თაბორიძე

, , , , , , , , , , , , , , , , , , , ,

2 Comments

საქართველოს ევროვიზიაზე Eldrine წარადგენს


19 თებერვალს პირველი არხის პირდაპირ ეთერში გამართულ ევროვიზიის ეროვნული ფინალში გაიმარჯვა ბენდმა Eldrine. ის 10 მაისს გერმანიაში გამართულ ევროფესტივალზე საქართველოს სახელით წარდგება. ჩემი პოსტი არ იქნება ეროვნული ფინალის ობიექტური განხილვა, არ მოგაწვდით იმ ინფორმაციას, რაც ისედაც იცით ან რასაც შეიძლება სხვაგან გაეცნოთ. თუ გაინტერესებთ რა ხდებოდა სცენაზე ჩემი სუბიექტური შეხედულებების გარეშე, უყურეთ myvideo-ზე ან tvali.ge-ზე 1 არხის19 თებერვლის ეთერის ჩანაწერს 6.30-საათიდან დან 7. 30-მდე.

ევროვიზიის ეროვნულ ფინალში მონაწილეობის სურვილი 50-მა მუსიკოსმა გამოთქვა. კონკურსში მონაწილეობა ნებისმიერს შეეძლო. ამისთვის საჭირო იყო საზოგადოებრივი მაუწყებლის შენობაში 10 თებერვლამდე
სპეციალურად ამ კონკურსისთვის შექმნილი სიმღერის, ავტობიოგრაფიისა და ფოტოსურათის მიტანა. 50-დან თავდაპირველად შეირჩა 10 კონკურსანტი, შემდეგ სამი კონკურსანტი (ბორის ბედია, თაკო გაჩეჩილაძე და ქეთი ორჯონიკიძე ) გამოეთიშა ევროვიზიის შესარჩევ ტურს: თაკო გაჩეჩილაძე ავად ყოფნის გამო, დანარჩენმა ორმა რატომ თქვა უარი მონაწილეობაზე, უცნობია. კითხვები ეროვნული ფინალის მიმართ თავიდანვე გაჩნდა. ცნობილი იყო, რომ “ნაციონალურ ფინალისტს მაყურებელი და ჟიური ერთობლივად გამოავლენენ. ხმის მიცემის პროცედურა ათივე კონკურსანტის გამოსვლის შემდეგ დაიწყება და 15 წუთს გასტანს. ამ დროის განმავლობაში მაყურებელს საშუალება მიეცემა თავის რჩეულს დაურეკოს ან დაუმესიჯოს. ზარის ღირებულება – 1 ლარი იქნება, თითოეული ნომრიდან – 20 ზარისა თუ სმს –ის დაფიქსირება მოხდება.” ანუ ვინ გაიმარჯვებდა დამოკიდებული იყო ჟიურიზეც და მაყურებელზეც. მაგრამ უცნობია, როგორ უნდა შეთანხმებულიყო ჟიურისა და მაყურებლის აზრი. მაგალითად, რა მოხდებოდა, თუკი ხალხის სიმპათია და ჟიურის ფავორიტი არ დაემთხვეოდა ერთმანეთს: ჟიურის გადაწყვეტილებას მიენიჭებოდა უფრო დიდი მნიშვნელობა თუ მაყურებლისას? გამარჯვებულის გამოცხადებისას არ დაუკონკრეტებიათ რომელმა შემსრულებელმა რამდენი ხმა მიიღო მაყურებლებისგან. ეჭვი მეპარება, რომ Eldrine-ს აეღო ყველაზე მეტი ხმა. იმიტომ კი არა, რომ ცუდი ჯგუფია. უბრალოდ მგონია, რომ თემო საჯაიასა და ნინი შერმადინს უფრო მეტი მსმენელი ჰყავთ, ვიდრე Eldrine-ს. ამიტომ ვინ იქნებოდა გამარჯვებული, ალბათ ჟიურიმ უფრო გადაწყვიტა, ვიდრე ხალხმა. უბრალოდ, რა საჭირო იყო მაშინ ამ “ხმის მიცემის პროცედურის” გამართვა, ვერ ვხვდები 😐

ყველაზე სასაცილო და კურიოზული რამ! შეიძლება იცით კიდევაც, მაგრამ მე ახლახანს გავიგე: ევროვიზიაზე გამოსული შემსრულებლები მღერიან მინუს ფონოგრამაზე! ის, ვინც ინსტრუმენტებით გამოდის, ჩათვალეთ, რომ ტყუილად უკავია. რუსულ მუსიკალურ შოუებში არის მსგავსი შემთხვევები ხშირად და ძალიან სასაცილოდ მეჩვენება, როგორ ცდილობენ შეგიქმნან ილუზია, რომ უკრავენ. ძალიან არაბუნებრივად გამოსდით. 🙂

ხშირად მსმენია, რომ ნამდვილი მუსიკოსი არ უნდა იღებდეს ისეთ კონკურსებში მონაწილეობას, როგორიც ევროვიზიაა. ეს ხომ, პირველ რიგში, კომერციული და პოლიტიკური შოუა. “ჭეშმარიტ” ხელოვანს კი მსგავსი “პაპსავიკური” პროექტები არ უნდა აინტერესებდეს. მაგრამ ამასთან უნდა აღინიშნოს, რომ ევროვიზია არის ევროპულ მუსიკალურ ბაზარზე გასვლის, კარგი პროდიუსერის პოვნისა და უცხოური ქვეყნის სცენაზე გამოსვლის საშუალება. ამიტომ ევროფესტივალში მონაწილეობის მიღება, ჩემი აზრით, სულაც არაა დასაძრახი.

მახსოვს, ძალიან ბევრი ადამიანის უკმაყოფილება გამოიწვია შარშან ევროვიზიისთვის გამოყოფილმა ფინანსებმა. “უღირს თუ არა საქართველოს “ევროვიზია” 802 100 ევროდ?” ამ საკითხზე ბევრი იდავეს. ეტყობა ორგანიზატორებმა ფინანსებთან დაკავშირებული შენიშვნები გაითვალისწინეს და ევროვიზიის ეროვნული ფინალისთვის რაც შეიძლება მცირე ხარჯები გამოყვეს. ეს ყველაფერი აისახებოდა: სცენის გაფორმებაზე, კონცერტისას დადგმულ შოუზე, მომღერალთა ტანსაცმელზე (მათ თვითონ იზრუნეს ჩაცმულობაზე)… თავად მუსიკოსებს უხდებოდათ აპარატურის ატანა-ჩამოტანა სცენაზე. მოკლედ, “სამ ტანცუემ, სამ პაიომ, სამ ბილეტი პრადაიომ” :დ


პირველი მაყურებლის წინაშე თემო საჯაია წარსდგა. სწორედ ის თემო, რომელმაც სულ ახლახანს საქართველოს პრეზიდენტად წარმოგვიდგინა თავი: “მე საქართველოს პრეზიდენტი ვარ,მე ვიბრძვი რომ შენც მითხრა “მიყვარხარ”- გვიმღეროდა ის თავის ბოლო კლიპში. ევროვიზიის შესარჩევ ტურზე თემო სამშობლოს დამცველ ჯარისკაცად წარმოგვიდგა:

არ მეგონა თუ ასეთი მაღალი იქნებოდა თემო საჯაია. დახვეწილი მანერებითა და საუბრით მაჩოს შთაბეჭდილება დატოვა :დ

სიმღერა, რომელიც იყო ჩემი ერთერთი ფავორიტი და რომელიც, ჩემი აზრით, მინიმუმ გაჰიტებას მაინც იმსახურებს, არის სალომე კორკოტაშვილისა და სემის Love. და საერთოდ უნდა ვთქვა, რომ კორკოტა ძალიან საყვარელი გოგოა თავისი ბავშვური იმიჯით 🙂 სემიც და სალომეც ბევრს იღიმებოდნენ. მიყვარს მოღიმარი ხალხი :პ

ჯგუფმა, რომელმაც იმთავითვე მიიქცია ყველას ყურადღება, განსაკუთრებით კი მამაკაცებისა, იყო სუპერსექსუალური ბენდის იმიჯზე პრეტენზიის მქონე „ტკბილი აბები“ (Sweet Pills). ყოველ ჯერზე როგორც კი ჩემს სამეგობრო წრეში ჩამოვარდებოდა საუბარი ევროვიზიაზე, სულ ამ გოგონებს ახსენებდნენ 🙂 ვინ უფრო ლამაზი, გამხდარი ან მაღალი იყო – კონკურსის დროსაც კი ამის გარჩევა მიმდინარეობდა :დ

“ვარსკვლავების აკადემიის” გამარჯვებული_ დიტო ლაგვილავა_ თუ გახსოვთ ? თავისუფალი, უკომპლექსო და მხიარული ადამიანი, როგორც თავის თავს ახასიათებს 🙂 ჯგუფ November-თან ერთად მანაც მიიღო მონაწილეობა ევროვიზიის შესარჩევ ტურში სიმღერით ,,ამ ახალ დღეს”.

საბერძნეთიდან დაბრუნებულმა ნინი შერმადინმა კონკურს x factor-ის გამარჯვებულის ტიტული და მავანთა თქმით ახალი სიყვარულიც _ მარკუს მეტრეველი_ მოიპოვა. ნინიმ ევროვიზიის კონკურსშიც სცადა ბედი, მაგრამ ცდა წარუმატებელი გამოდგა. არადა ბევრი სწორედ მას უწინასწარმეტყველებდა გამარჯვებას. სხვათაშორის მარკუსიც თან ახლდა კონცერტზე :პ

კონკურსზე ყველაზე სიმპატიური ბიჭები ყველაზე არაქართული ჟღერადობის მქონე ჯგუფის (როგორც წამყვანმა აღნიშნა), The Georgians-ის, წევრები იყვნენ. “შეხედე, შეხედე რა საყვარელია” ჩურჩულებდნენ ჩემ უკან ვიღაც გოგოები მათი გამოსვლისას. კინაღამ მივუტრიალდი და ვუთხარი “დაწყნარდით, ოთხივეს შეყვარებული ჰყავს” :დ

გამარჯვება ყველაზე ბოლოს გამოსულ ბენდ Eldrine-ს ერგო. ამ ბენდს პირველად Tbilisi AlterVision-ზე მოვუსმინე. რადგანაც ერთერთ ძველ პოსტში მიწერია Eldrine-ს შექმნის ამბავი (ამბავია სწორი და არა ისტორია:პ) აქ აღარ დავწერ. კონკურსის დღეს ჯგუფის ვოკალისტს მაღალი სიცხე ჰქონდა და ამის გამო არც წინა დღეებში გამართულ რეპეტიციებს დაესწრო. თუკი საქართველოს ევროვიზიაზე წარმდგენი წინა სამი კონკურსანტი სოლო-შემსრულებელი იყო, ამჯერად მას პირველად ბენდი წარადგენს. მოიპოვებს თუ არა წინა წლებთან შედარებით უფრო მაღალ ადგილს საქართველო ევროვიზიაზე, ამას 10 მაისს გავიგებთ. წარმატებას ვუსურვებ Eldrine-ს!

, , , , , , , , , , , , , , , , , , , , ,

13 Comments

Aivani 2010 winner

“კიდევ ერთხელ გთხოვთ, რომ ხმა მისცეთ ….. . უბრალოდ შედით ამ ლინკზე და დააჭირეთ “I like It” http://www.mgi.ge/ka/index.php?p=aivani
წინასწარ გიხდით მადლობას და ბოდიში შეწუხებისთვის კიდევ ერთხელ!”

ალბათ ბევრ თქვენგანს არაერთხელ მიუღია ამ ბოლო დროის განმავლობაში მსგავსი შინაარსის გზავნილები ფეისბუქზე. ხმები პროექტ “აივნის” კონკურსში გასამარჯვებლად ჭირდებოდათ. საბოლოოდ რამდენიმე ქართულ ჯგუფს შორის ყველაზე მეტი “like” (4566) დააგროვა The Georgians-მა, შესაბამისად ის 2010 წლის გამარჯვებულიც გახდა. შეგახსენებთ, რომ აივანი არის მუსიკალური ონლაინ–შოუ, რომელიც გვთავაზობს ჯგუფებისა და მუსიკოსების ცოცხალ შესრულებას.(ჩემი პოსტი ამ პროექტის შესახებ).

8 იანვარს კლუბ 33ა–ში აივნის პირველი სეზონის დახურვასთან დაკავშირებით გაიმართა კონცერტი, რომელშიც გამარჯვებულ ბენდ The Georgians–თან ერთად ასევე მონაწილეობდა აივანზე გამოსული შვიდი ჯგუფი. Read the rest of this entry »

, , , , , , , , , , , , , , , , ,

10 Comments

Nights Of Arles in Tbilisi

15 მაისს თბილისში ერთდროულად 3 ადგილას: აბანოთ-უბანში, გუდიაშვილის ბაღსა და შარდენზე ღია ცის ქვეშ გაიმართა კონცერტი. კონცერტზე გამოვიდნენ ის ახალბედა ბენდები, რომლებმაც მონაწილეობა მიიღეს Tbilisi Alter\Vision\stars for newcomers-ში.. მუსიკოსები ასე განაწილდნენ სცენის ადგილმდებარეობის მიხედვით: აბანოებთან Mirror Illusion, Rema და პორნოპოეზია უკარვდნენ, შარდენზე The Georgians, Ketrine and me, ABC, გუდიაშვილის ბაღში კი Me and My Monkey და Forest.


The Georgians
Tbilisi Open Air-ს ფესტივალს მონატრებულს ერთი სული მქონდა როდის დადგებოდა 15 მაისი. ეს ფესტივალი შარშან ზუსტად ამ დროს დაიწყო. ორგანიზატორების თქმით, Tbilisi Open Air 2010 აგვისტოს გაიმართება ბათუმში და შესაძლოა Prodigy ჩამოიყვანონ. ეს ინფორმაცია პირად საუბრებში გაისმა, ოფიციალური განცხადება ამასთან დაკავშირებით ჯერ არ გაკეთებულა. Nights Of Arles in Tbilisi-მ სულ მცირედ მაინც დააკმაყოფილა ჩემი სურვილი Open Air-ის ფესტზე ყოფნისა.
ჩემი პირველი უკმაყოფილება გამოიწვია იმან, რომ სამივე სცენაზე კონცერტი იწყებოდა ერთსა და იმავე დროს: 8 საათზე. არადა ყველა ჯგუფის გამოსვლა მაინტერესებდა, ეს კი შეუძლებელი აღმოჩნდა. უკეთესი იქნებოდა სხვადასხვა დროს დაწყებულიყო ეს კონცერტები. სამი სცენის იდეა თავიდან არ მომეწონა, მაგრამ მერე რომ ვნახე თბილისის ქუჩებში აქთ-იქით, ერთი სცენიდან მეორისკენ მოსიარულე ხალხი, ეს იდეაც დავაფასე. პატარა “მოგზაურობას” დაესმგავსა ეს მიმოსვლა: ტოვებდი ერთ სეცნას და მიდოდი მეორესთან იმის ფიქრით, აბა აქ ახლა ვინ უკრავს ნეტავ, როგორი სცენაა, როგორი ხმაა, სჯობია თუ არა პირველ სცენას, რამდენი ხალხი იქნება, ნაცნობები თუ იქნებიან და ა.შ. სხვების არ ვიცი, მაგრამ მე კი ნამდვილად ამ ფიქრებით მივდიოდი სხვა სცენისკენ.
თავიდან ბევრი წუწუნი მოვისმინე ხმის ჟღერადობაზე. ნახეს რა გამომსვლელმა ბენდებმა აპარატურა, მაშინვე გამოთქვეს უკმაყოფილება: ამ აპარატურით რა “ზვუკი” უნდა დააყენო, საშინელება იქნებაო. ამ სამი სცენის აწყობას სჯობდა ერთი გაეკეთებინათ და ხარისხიანი აპარატურა დაედგათო. საბოლოოდ კონცერტზე ხმის ნორმალური ჟღერადობა იყო (ნორმალურში ვგულისხმობ თბილისისთვის, საქართველოსთვის ნორმალურს 😀 )


My And My Monkey

შარდენზე კონცერტი რამდენიმე წუთით შეჩერდა: სიონიდან გადმოსულმა მღვდლებმა ორგანიზატორებს სთხოვეს ცოტა ხნით შეეწყვიტათ დაკვრა, რადგან პატრიარქი იყო მობრძანებული ტაძარში. Sound-check-იც მოგვიანებით შედგა, რადგან სიონში ამ დროს წირვა მიმდინარეობდა. ადრეც მითქვამს, რომ როკ-კონცერტზე ანაფორიანების დანახვა შიშს მგვრის. თანაც ხალხში მმკ-ს რამდენიმე წევრი დავლანდე 😐 საბედნიეროდ კონცერტი მშვიდობიანად გაგრძელდა და დასრულდა.

ამ დღეს ვნახე უამრავი ნაცნობი, დავლიე ბევრი ლუდი, ვიცეკვე დაღლამდე. მოკლედ მშვენიერი დრო გავატარე 🙂

, , , , , , , , , , , ,

11 Comments

Tbilisi Alter\Vision\stars for newcomers ანუ ამბავი იმისა, როგორ აჯობეს ქართველ ვარსკვლავებს newcomer-ებმა :D

როგორც იქნააა!!! 14 მარტს ფილარმონიაში გაიმართა “საქართველოში უპრეცედენტო პროექტი”, კონცერტი, რომლის “ანალოგიც ჩვენთან ჯერ არ ჩატარებულა” (როგორ ორგანიზატორები გვპირდებოდნენ) ანუ Tbilisi Alter\Vision\stars for newcomers. ჩემი შთაბეჭდილებები მინდა მოგითხროთ ამ კონცერტის შესახებ.
კონცერტი თავდაპირველად 8 მარტს უნდა გამართულიყო, გარეთ, რესპუბლიკის მოედანზე. თუმცა საბოლოოდ თარიღიცა და ადგილიც შეიცვალა. ასევე ჯგუფმა Me and my monkey-მ უარი თქვა მასში მონაწილეობაზე. მათ მაგივრად “ვიტამინი” გამოვიდა. The Forest-თან კი ნანი ბრეგვაძის მაგივრად ეკა მამალაძემ იმღერა.
14 მარტს ფილარმონიის სცენაზე ვიხილეთ 8 ახალბედა ბენდი: the Georgians, Ketrine & Me, Rema, ABC, პორნოპოეზია, Mirror Illusion, ვიტამინი, the Forest. მათ შეასრულეს დუეტები შემდეგ “სტარებთან” ერთად: ირინა თაბორიძე, ლექსენი, მაია დარსმელიძე, სოფო ხალვაში, თიკა ფაცაცია, სალომე კორკოტაშვილი, ქეთათო, ეკა მამალაძე. ბევრმა უარყოფითად შეაფასა ალტერნატივშიკებისა და პოპის წამომადგენლების ერთად გამოჩენა სცენაზე. ფორუმებზე, პირად საუბრებში ყველა მსგავს ფრაზებს ამბობდა:”ლექსენი რა ასაშვებია სცენაზე”, “პაპსავიკებს რა უნდათ როკ-კონცერტზე” და ა.შ. მე კი დამაინტერესა ამ ექპერიმენტმა: რატომაც არა, დაე გამოვიდნენ პაპსავიკები ალტერნატივშიკებთან ერთად:) კონცერტის შემდეგ დავრწმუდნი, რომ ეს newcomer ბენდები არანაირად არ ჩამორჩებიან ჩვენს ვარსკვლავებს და ზოგს ბევრად სჯობიან კიდეც 🙂
აქამდე რაც მოვისმინე აზრი Tbilisi Alter\Vision\stars for newcomers-ის შესახებ, თითქმის 80% ნეგატიურია. არადა კონცერტს ჰქონდა თავისი კარგი მხარეებიც. არასწორი იქნება თუ ყურადღებას მხოლოდ ცუდზე გავამახვილებთ. მოკლედ, ჩამოვთვლი რა მომეწონა და რა არ მომეწონა.

კატეგორია “-“

პირველ რიგში არ მომეწონა ადგილი: ჩემი აზრით, ფილარმონია არ შეეფერება ასეთ კონცერტებს. ფილარმონია ჩემში “იუმორინას”, ან ქართველი მეგავარსვკლავების გრანდიოზული კონცერტის ასოციაციას იწვევს 😀 ბევრად კარგი იქენბოდა ღია ცის ქვეშ გამართულიყო. თუმცა, ორგანიზატორების მესმის, ცუდი ამინდის გამო Stars for newcomers რესპუბლიკის მოედანზე აღარ ჩატარდა. სიტუაცია ფილარმონიაში იყო რაღაც არაშესაბამისი ცოცხალი კონცერტებისთვის: პირველ რიგში, მხედველობაში მაქვს სრულიად “მკვდარი” პუბლიკა. შემსრულებელმა უნდა იგრძნოს მაყურებლიდან წამოსული ენერგია, სტიმული. ფილარმონიაში კი ხალხი უმოძრაოდ იჯდა სკამებზე და ტაშსაც ძლივს უკრავდა (წინა რიგის გამოკლებით 🙂 )

ხმა: ოო ისევ და ისევ ეს “ზვუკი” 😐 ზოგ სიმღერაში ვოკალის ხმა არ მესმოდა საერთოდ, ზოგან – სიმებიანი საკრავების ხმა, ზოგან – კლავიშის ხმა. არ მეგონა თუ სპორტის სასახლეში გამართული Alter\Vision-ის შემდეგ ვერ გამოასწორებდნენ ამ შეცდომას ორგანიზატორები. არ ვიცი რას დავაბრალო: ცუდ აპარატურას, ხმის რეჟისორის არაპროფესიონალიზმს თუ სხვა რამეს. არადა მგონი ხარისხიანი აპარატურა იყო.

ზოგიერთი სიმღერისთვის დადგმული შოუ: ზოგ სიმღერაში მოცეკვავეების გამოყვანა სცენაზე პირადად მე არასაჭიროდ მომეჩვენა. მაგალითად, ABC-ის გამოსვლა ბევრად უფრო კარგი იქნებოდა მოცეკვავეების გარეშე. ასევე ავღნიშნავ, რომ მოცეკვავეები არ იყვნენ კარგად მომზადებულები, არასინქრონულად ცეკვავდნენ.

კატეგორია “+”

მომეწონა სცენის გაფორმება და განათება.

მომეწონა შემსრულებელთა ჩაცმულობა და მაკიაჟი.

მომეწონა the Georgians-ისა და ირინა თაბორიძის დუეტი.The killers-ისა და Muse-ს სიმღერების საინტერესო ვერსიები წარმოგვიდგინეს. შერულებაც კარგი იყო. ირინას ხმა მომეწონა, კონცერტზე იმდენად არ გამოჩნდა, აი რეპეტიციებზე კი მიკროფონის გარეშე მღეროდა და ყველა ინსტრუმენტის ხმას ფარავდა :)the Georgians-ის გამოსვლა იყო დრაივიანი, უბრალოდ, სამწუხაროდ, მაყურებელმა ვერ შეუწყო ხელი.

მომეწონა Rema-ს გამოსვლა. კარგი შერულება ჰქონდათ და თქვენ წარმოიდგინეთ სუმოისტები რომ გამოიყვანეს სცენაზე, ეგეც მომეწონა. ჩემი აზრით, შეეფერებოდა Rema-ს სიმღერას ასეთი შოუ.

მომეწონა the Forest-ისა და ეკა მამალაძის დუეტი. სიმღერაც საინტერესო და სასიამოვნო იყო და ამ სიმღერაზე დადგმული შოუც.

მომეწონა პორნოპოეზიისა და თიკა ფაცაციას სიმღერაზე დადგმული შოუ.

ვიტამინისა და ქეთათოს დუეტზე დადგმული ცეკვა.

შენიშვნის სახით მინდა ვთქვა, რომ სჯობდა ბენდებს უფრო მეტი საკუთარი სიმღერა გაეტანათ კონცერტზე და არა ქავერები.

ნეტა რომელი ბენდები შეირჩევიან ამ რვიდან Openair 2010-თვის? მე უკვე მყავს ჩემი ფავორიტები 🙂

, , , , , , , , , , , , , , , , , , , , , ,

12 Comments

%d bloggers like this: